Muaji i festave është gjithashtu muaji i duhur për të lexuar librat e preferuar.
Elegance ju sjell 5 tituj shqip, të cilët me siguri do ju lënë shumë mbresa.
Mërkuna e Zezë nga Agron Tufa
800 lekë
Në traditën dhe botën shqiptare kemi dëgjuar shpesh për magjitë dhe gratë që i praktikojnë ato. Pikërisht, kjo tematikë trajtohet në romanin “Mërkuna e Zezë” nga Agron Tufa, i cili rreket të përmbledhë një përvojë të tillë, pa shumë stërhollime, por me një mënyrë të drejtpërdretë dhe shumë “shqeto”, duke eksploruar një botë të thellë mistike dhe të çuditshme, që nga zanafilla deri te pushteti i bukurisë, pasioneve dhe dëshirave, të cilat ndonjëherë edhe vetë gratë nuk e dinë pse i duan dhe rrjedhimisht, as nuk munden t’i shpjegojnë.
Subjekti vërtitet rreth Gurit, i cili viziton fshatin e largët të dajës së tij dhe e gjen veten si i vetmi djalë në një shtëpi me shumë gra, të cilat e bëjnë pjesë të vorbullës së tyre mes joshjes, magjive, seksualitetit, lakuriqësisë dhe për më tepër, synimeve të tyre të paqarta. Në fakt, vetë gratë nuk e dinë çfarë duan prej Gurit, ta vrasin, ta joshin, ta mbrojnë?
Agron Tufa, mjeshtër i shtresëzimit të romaneve, na dërgon në thjeshtësinë poetike të narracionit, duke e kamufluar këtë të fundit me mite arkaike, në diskutime të gjera mes dominimit të matriarkatit apo patriarkatit dhe dredhive të paepura të grave. Kjo gjetje vjen si një paradoks i pashmangshëm, në një shoqëri postmoderne, ku roli i gruas është absolut.
Diktatori në kryq nga Mira Meksi
900 lekë
Në ditët e fundit, ku vdekja duket më e sigurt se teoremat e provuara, diktatorit i shfaqet e gjithë ekzistenca e tij, ajo e vërteta, e pamohueshmja, e cila e fshikullon përmes kohës dhe përvvojës. Dashuritë në Paris, lufta mes vetes dhe botës, pushteti, krimet, tradhtitë e vogla e të mëdha, vrasja e Zotit dhe fesë, izolimi i zemrës dhe i një kombi të tërë, hipokrizia e pamatë, e gjetur që nga analfabeti e deri tek Sekretarët e Partisë dhe makthet që risjellin hijet e së shkuarës, të vdekur e të dergjur nëpër biruca, por edhe impakti vrastar i të gjallëve; të gjitha kalojnë përmes syve të mendjes. Diktatori projekton kthimin nga e pashmangshmja, nga vetë vdekja. Përmes Reliktes së Shenjtë të Ringjalljes, ai kërkon një jetë të dytë, për të bërë ndryshe, për të sjellë një version të ri të mendësisë dhe shpirtit të tij.
Aurat e natës nga Belfjore Qose
700 lekë
Pedagogia e letërsisë, pas shumë vitesh krijimi dhe përpunimi të vazhdueshëm e të parreshtur të teksteve, më në fund vendos të komunikojë me lexuesin përmes librit të parë poetik, “Aurat e natës”. Kjo përmbledhje është vlerësuar me disa çmime dhe është përqafuar menjëherë nga publiku.
I gjithë vëllimi përmban 88 poezi, të ndara në 4 kaptuj. Autorja ka një gjuhë shumë të pasur poetike, çka i bën ndjesitë më të gjalla dhe të përjetueshme.
Duke kërkuar Itakën nga Frederik Rreshpja
1,000 lekë
Frederik Rreshpja është ndoshta një prej poetëve më të vyer të letërsisë shqiptare, i cili arrin të penetrojë dhe depërtojë në çdo ndjesi, duke na njohur vuajtjet e tij të vazhdueshme. Ndonëse poeti nuk e ka aspak për qëllim të na ankohet apo të ngjallë mëshirë, është e pashmangshme që të qëndrojmë indiferentë kur na paraqiten të tilla sprova.
Në këtë botim do të gjeni një përmbledhje të 46 viteve krijimtari të poetit të dashur, dorëshkrime nga gazetat, revistat, apo librat. Libri shoqërohet edhe më një parathënie të gjatë nga Ismail Kadare, i cili është shprehur gjithnjë se e vlerëson shumë poezinë e Rreshpjes.
Për Frederik Rreshpjen, koha, jeta, sistemi ka qenë të pamëshirshme, një thundër e rëndë, me një peshë të padurueshme, por dashuria e lexuesve është lehtësimi dhe shpërblimi më i madh.
Gjama e erës nga Erenestina Gjergji Halili
700 lekë
Kur pedagogia e dramës shqipe njoftoi se do të botonte një përmbledhje poetike, të gjithë e dinin se do të përmbante poezi mahnitëse, por shitjet rekord dhe kritika e cila e vlerësoi si “një ndër vëllimet poetike më të mira të viteve të fundit” provuan se fjalët e saj të shkruara në gegnishte, arritën të preknin çdo lexues.
Me “Gjama e erës”, poetja eksperimentoi me poezinë dhe me gjuhën e nanës, me rrënjët e saj, duke na sjellë një shqipe të pastër dhe të kulluar, e cila përmban peshën e çdo ndjesie.
